ಚಿಕನಾಳ ಗ್ರಾಮ ಪಂಚಾಯಿತಿಯ ಮಕ್ಕಳ ಸ್ನೇಹಿ ‘ಓದುವ ಬೆಳಕು’ ಹೈಟೆಕ್ ಗ್ರಂಥಾಲಯ

ಹುನಗುಂದ:ಬಾಗಲಕೋಟೆ ಜಿಲ್ಲೆಯ ಚಿಕನಾಳ ಗ್ರಾಮದಲ್ಲಿ, ಹಲವು ವರ್ಷಗಳಿಂದ ನಿರ್ಲಕ್ಷ್ಯಕ್ಕೊಳಗಾಗಿ ಪಾಳುಬಿದ್ದಿದ್ದ ಶಾಲಾ ಕಟ್ಟಡವೊಂದು ಇಂದು ಜ್ಞಾನದ ಬೆಳಕಿನ ಕೇಂದ್ರವಾಗಿ ಪರಿವರ್ತನೆಯಾಗಿದೆ. ಗ್ರಾಮ ಪಂಚಾಯಿತಿಯ ದೂರದೃಷ್ಟಿ, ಜನಪ್ರತಿನಿಧಿಗಳ ಸಮರ್ಪಣೆ ಮತ್ತು ಗ್ರಾಮಸ್ಥರ ಸಹಕಾರದಿಂದ ನಿರ್ಮಿತವಾದ ಈ ಹೈಟೆಕ್ ಗ್ರಂಥಾಲಯ ಗ್ರಾಮೀಣ ಭಾಗದ ವಿದ್ಯಾರ್ಥಿಗಳು, ಸ್ಪರ್ಧಾತ್ಮಕ ಪರೀಕ್ಷಾರ್ಥಿಗಳು ಹಾಗೂ ಮಕ್ಕಳಲ್ಲಿ ಓದುವ ಹವ್ಯಾಸ ಬೆಳೆಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತಿದೆ.

Petkarmedia:ನಿರ್ಲಕ್ಷ್ಯಕ್ಕೊಳಗಾಗಿದ್ದ ಚಿಕನಾಳ ಗ್ರಾಮದ ಗ್ರಂಥಾಲಯ

ಗ್ರಾಮಾಂತರ ಪ್ರದೇಶದಲ್ಲಿ ಗುಣಮಟ್ಟದ ಗ್ರಂಥಾಲಯದ ಅಗತ್ಯತೆ ಬಹುಕಾಲದಿಂದಲೇ ಇತ್ತು. ಎಸ್‌ಎಸ್‌ಎಲ್‌ಸಿ, ಪದವಿ, ಸ್ನಾತಕೋತ್ತರ ಪದವಿ ವಿದ್ಯಾರ್ಥಿಗಳು ಮಾತ್ರವಲ್ಲದೆ ಐಎಎಸ್, ಐಪಿಎಸ್, ಕೆಎಎಸ್, ಎಫ್‌ಡಿಎ, ಎಸ್‌ಡಿಎ, ಶಿಕ್ಷಕ, ಪೊಲೀಸ್ ಸೇರಿದಂತೆ ವಿವಿಧ ಹುದ್ದೆಗಳ ನೇಮಕಾತಿ ಪರೀಕ್ಷೆಗೆ ಸಿದ್ಧರಾಗುವ ಯುವಜನರಿಗೆ ಬೇಕಾದ ಪುಸ್ತಕಗಳು, ಮಾಸಪತ್ರಿಕೆಗಳು ಮತ್ತು ಓದುವ ಸೌಲಭ್ಯಗಳು ಇಲ್ಲಿ ಲಭ್ಯವಾಗಿವೆ. ಪ್ರತಿದಿನ 50ಕ್ಕೂ ಹೆಚ್ಚು ಓದುಗರು ಗ್ರಂಥಾಲಯಕ್ಕೆ ಭೇಟಿ ನೀಡುವುದು ಇದರ ಜನಪ್ರಿಯತೆಗೆ ಸಾಕ್ಷಿ.

Petkarmedia: ಅಭಿವೃದ್ಧಿಗೊಂಡ ಚಿಕನಾಳ ಗ್ರಾಮದ ಮಕ್ಕಳ ಸ್ನೇಹಿ ಗ್ರಂಥಾಲಯ

ಒಂದು ಕಾಲದಲ್ಲಿ ಜಾಗದ ಕೊರತೆಯಿಂದ ಕೇವಲ ಒಂದು ಸಣ್ಣ ಕೊಠಡಿಗೆ ಸೀಮಿತವಾಗಿದ್ದ ಗ್ರಂಥಾಲಯ, ಇದೀಗ ಗ್ರಾಮ ಪಂಚಾಯಿತಿಯ 15ನೇ ಹಣಕಾಸು ಯೋಜನೆ ಅನುದಾನದಡಿ ಸಂಪೂರ್ಣ ರೂಪಾಂತರಗೊಂಡಿದೆ. ಸುಮಾರು ₹4.80 ಲಕ್ಷ ವೆಚ್ಚದಲ್ಲಿ ಪಾಳುಬಿದ್ದ ಶಾಲಾ ಕಟ್ಟಡವನ್ನು ದುರಸ್ತಿ ಮಾಡಿ, ನಂತರ ಬೇರೆ ಮೂಲಗಳಿಂದಲೂ ಅನುದಾನ ಸಂಗ್ರಹಿಸಿ ಒಟ್ಟು ₹8 ಲಕ್ಷ ವೆಚ್ಚದಲ್ಲಿ ಸುಸಜ್ಜಿತ ಹೈಟೆಕ್ ಗ್ರಂಥಾಲಯವನ್ನು ನಿರ್ಮಿಸಲಾಗಿದೆ. ಓದುಗರ ಬೇಡಿಕೆಗೆ ತಕ್ಕಂತೆ ಕುರ್ಚಿ–ಮೇಜು ವ್ಯವಸ್ಥೆ, ಶಾಂತ ಓದುವ ವಾತಾವರಣ, ಸಿಸಿಟಿವಿ ಭದ್ರತೆ ಸೇರಿದಂತೆ ಅಗತ್ಯ ಮೂಲಸೌಲಭ್ಯಗಳನ್ನು ಒದಗಿಸಲಾಗಿದೆ.

ವಿಶೇಷವಾಗಿ ಮಕ್ಕಳಿಗಾಗಿ ಆರಂಭಿಸಿದ ‘ಓದುವ ಬೆಳಕು’ ಕಾರ್ಯಕ್ರಮ ಈ ಗ್ರಂಥಾಲಯದ ಮತ್ತೊಂದು ಹೆಗ್ಗಳಿಕೆ. 6 ರಿಂದ 18 ವರ್ಷ ವಯಸ್ಸಿನ ಮಕ್ಕಳಿಗೆ ಅನುಕೂಲವಾಗುವಂತೆ ಪ್ರತ್ಯೇಕ ಆಸನ ವ್ಯವಸ್ಥೆ, ವಯೋಚಿತ ಪುಸ್ತಕಗಳು, ಚದುರಂಗ ಮತ್ತು ಕೇರಂ ಆಟಗಳ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ. ಇದರಿಂದ ಮಕ್ಕಳು ಕೇವಲ ಪಠ್ಯವಷ್ಟೇ ಅಲ್ಲದೆ ಮನರಂಜನೆಯ ಮೂಲಕವೂ ಕಲಿಕೆಗೆ ಆಸಕ್ತಿ ತೋರುತ್ತಿದ್ದಾರೆ.

ಗ್ರಾಪಂ ಅಧ್ಯಕ್ಷೆ ರತ್ನವ್ವ ತಿಪ್ಪಣ್ಣವರ ಅವರ ಮಾತಿನಂತೆ, “ಗ್ರಾಮದಲ್ಲಿ ಸೂಕ್ತ ಜಾಗದ ಕೊರತೆಯಿಂದ ಉತ್ತಮ ಗ್ರಂಥಾಲಯ ಸ್ಥಾಪನೆ ಸವಾಲಾಗಿತ್ತು. ಉಪಯೋಗವಿಲ್ಲದ ಕಟ್ಟಡವನ್ನು ಗುರುತಿಸಿ, 15ನೇ ಹಣಕಾಸು ಯೋಜನೆಯ ಅನುದಾನದಲ್ಲಿ ದುರಸ್ತಿಗೊಳಿಸಿ, ಸಕಲ ವ್ಯವಸ್ಥೆ ಕಲ್ಪಿಸಿದ್ದೇವೆ. ಇದರಿಂದ ವಿದ್ಯಾರ್ಥಿಗಳು ಮತ್ತು ಉದ್ಯೋಗಾಕಾಂಕ್ಷಿಗಳಿಗೆ ನಿಜವಾದ ಪ್ರಯೋಜನವಾಗುತ್ತಿದೆ.”

ಒಟ್ಟಾರೆ, ಚಿಕನಾಳ ಗ್ರಾಮ ಪಂಚಾಯಿತಿ ಕೈಗೊಂಡ ಈ ಕಾರ್ಯ ಗ್ರಾಮೀಣ ಶಿಕ್ಷಣಕ್ಕೆ ಹೊಸ ದಿಕ್ಕು ನೀಡಿದೆ. ಪಾಳುಬಿದ್ದ ಕಟ್ಟಡವೊಂದು ಇಂದು ಮಕ್ಕಳ ಓದುಗ ಸ್ನೇಹಿ, ಯುವಜನರ ಕನಸುಗಳಿಗೆ ಬೆಂಬಲ ನೀಡುವ ಜ್ಞಾನಮಂದಿರವಾಗಿ ಬೆಳೆಯಿರುವುದು—ಸ್ಥಳೀಯ ಆಡಳಿತ, ಜನಪ್ರತಿನಿಧಿಗಳು ಮತ್ತು ಗ್ರಾಮಸ್ಥರ ಒಗ್ಗಟ್ಟಿನ ಸಾಧನೆಯ ಪ್ರತೀಕವಾಗಿದೆ.

Petkarmedia: ಸ್ಥಳೀಯ ಸುದ್ದಿಗಳಿಗಾಗಿ ನೋಡಿ.